اخى اختى فى الله
فى البدايه عايزة اقولكم صبرا فان بعد الكرب فرجا
انا عارفة انها سنة صعبة لكن ان شاء الله الطريق امامكم هيكون ميسر
اهم حاجة اتعلمناها فى سنة اعدادى هى القدرة على التحمل وعموما انا كنت بس عايزة انصحكم نصيحة وهى
اوعى حد فيكم يطلع من اعدادى الا وهو فاهم كويس خاصة لو عايز يدخل نظم وانتم لسه فيها ذاكروا كويس لو حد عايز يدخل نظم ياريت يفهم الرياضه كويس خاصة التكامل افهموا التكامل كويس اوى قبل ما تنووا تدخلوا نظم علشان ما تتعبوش
وذاكروا اول باول علشان الترم التانى اصعب بكتير مش علشان عدد المواد بس لا علشان وقته صغير اوى واوله امتحانات اعمال سنه
عموما شدوا حيلكم مفيش حاجه صعبة مع وجود الارادة وصدقونى كل ما تتعب فى الكليه دى بالذات خاصة فى اعمال السنة هتلاقى ان شاء الله
وربنا معاكم

شكراً لكِ با أزهرية على النصائح الغالية لطلبة إعدادى

وأحب أزيد وأقول رأيى فى إن أجازة نصف العام هى الفيصل فى سنة إعداى

لو استطعت أنك تلم كل ما درسته من المواد فى هذه الأجازة فستستريح جداً فى الترم التانى

وإلا فستتراكم عليك المواد فى الترم التانى خصوصاً إن الدكاترة هتجرى فى المنهج بسرعة كبيرة جداً وهتلاقى إنك مش ملاحق على حاجة خصوصاً إن الرسم والوصفية هياخدوا معظم وقتك

ودى نصيحة من واحد جرب كل ده وملاقاش حد ينصحه

ونرجو لكل طلبة إعدادى التفوق بإذن الله

فعلا كلام كويس وانا معاكم وربنا ييسر ليكم الامور

بسم الله الرحمن الرحيم

.........................

جزاكى الله خيرا على النصيحة

وارجوا أن يفعل بها جميع الإخوة والأخوات طلاب كليات الهندسة

............... ولكن أهم مادة يجب أن يكون طالب وطالبة الهندسة أن يلم بجميع أقسامها فهما تاما هيا مادة الرياضيات فهى أساس العلوم عامة والهندسية بصفة خاصة لأنها تساعد على تكوين المنطق الهندسى الذى لا غنا عنه لأى مهندس فالمنطق هو الذى يساعد المهندس على أن يكون رأيه صائب ودقيق .

فلا تكتفوا بما يدرس لكم فى الكلية حاولوا الإكثار من حل المسائل الرياضية استعينوا بالمراجع وخاصة التى تتحدث عن الجبر والتفاضل والتكامل والهندسة التحليلية وحساب المثلثات فهذه الأقسام هيا الأساس الذى يجب على كل مهندس أن يكون ملما بها تماما

وفقكم الله وأعانكم بالصبر على العلم .........

كلمة أخيرة :
اجعلوا قلوبكم عامرة بذكر الله وعقولكم بطاعته
فـــــــــــى كل كلمة تصدر منكم أو تقال لكم وأى فعل ورد فعل

فعلاً معك حق أخى إسلام

الرياضة هى أهم مادة فى هذه الكلية خصوصاً لو هتدخل نظم أو كهرباء