ياجماعة النتيجة لسة ماخلصتش لحد دلوقتى فى الكنترول مافيش غير رابعة كهرباء هى اللى ظهرت على موقع الأهرام وقسم النظم ظهر كله على الموقع الخاص بالقسم ولولا ان عندهم دكتور مسؤل عن موقعهم على النت وكان بيتابع الكنترول عشان يخلصوا النتيجة بسرعة ويعرف ينزلها على النت كانت زمنها لسة ماخلصتش برده أما بقية النتايج لسة قدمها اسبوع على الأقل أنا لى واحد زميلى فى 3 عمارة قالى ان لسة فى مادة مادخلتش الكنترول لحد دلوقتى.
أنا كنت فى الكلية من يومين أنا فى 2 كهرباء وجبت نتيجتى بالعافية من الكنترول عن طريق محمد (الحارس على مبنى كهرباء) واشترط عليا ان يأخذ 10 جنيه عشان يجبهالى من الكنترول حاولت أقنعه ان خمسة جنيه كويسة مارضيش أبدا ؟؟؟؟؟

انا أعتقد ان النتيجة لسة قدمها اسبوع على الأقل عشان تتعلق.

مع تمنياتى بالتوفيق للجميع.....

مش عارف بصراحة أنا بفكر أروح بكرة أسأل على نتيجتى (إعدادى)

لو رحت ولقيت جديد هبلغكم إن شاء الله

بالنسبة للاستبيان أعتقد إننا المفروض نقدم شكوى لرئيس الجامعة

متشكرين جدا يابشمهندس احمد على المعلومات دية
وبما انك فى كهربا ممكن تدينا فكرة عن القسم

وياريت تقولنا انت قسم باور ولا اتصالات

العفو يابشمهندس عمرو ..
أنا فى قسم power ....
بخصوص القسم : شوف فى طلاب بيدخلوا قسم كهرباء علشان الشغل بعد كده (بيقولوا ان فرص العمل فيه أكتر) هو وقسم ميكانيكا وفى ناس بيخافو يدخلوا القسم بيقولوا انه أصعب قسم وأنا مش موافق على الكلام ده كل الاقسام لو ماذاكرتش فيها حتبقى صعبة وانا رأيى ان كل الاقسام زى بعض من ناحية المذاكرة والواحد لازم يدخل القسم اللى يناسب ميوله يعنى أنا مثلا دخلت كهرباء علشان بحب الاجهزة الكهربية يعنى كمبيوتر وتلفزيون...الخ . بالإضافه للماكينات العملاقة فأنا بعشقها الواحد وهو بيشغل الماكينة العملاقة دى بشوية أزرار بيحس قد إيه القوة اللى بتديها الكهرباء للإنسان وبيعرف جزء بسيط من حجم النعم اللى ربنا ادهالنا عشان كده أنا دخلت power. انا رأى ان الكهرباء سحر وهى أخطر اكتشاف اكتشفه الإنسان. الواحد بضغطة زرار ينور عمارة أو يشغل مصنع أو حتى يطلق صاروخ . يصقع الجو فى الصيف ويدفيه فى الشتاء (أقصد التكييف طبعا)ولولا الكهرباء ماكنش لأقدر أكلمك وتكلمنى.
أما الصعوبة والشغل والحاجات دى فمش لازم تأثر على اختيار القسم أبدا......
وبالتوفيق ان شاء الله....................

شكراً لك أخونا أحمد على المشاركة برأيك وخبرتك وأنا كنت بقول كده إن أنا أخش القسم اللى بحبه عشان أتميز فيه بغض النظر هل سأجد شغل فيه أم لا لأن هذا غيب والأرزاق بيد الله المهم أعمل ما ينبغى على والله تعالى سيوفقنى

متشكر اوى يا بشمهندس احمد بس انت اية رأيك
كهربا اصعب ولا اعدادى

من ناحية الصعوبة هى اعدادى مش أصعب بس هى تقيلة شوية أقصد فى شغل الكلية يعنى مواد كتير...... رسم لوحات رسم هندسى ورسم لوحات وصفية وبعد ماتتعب فى اللوحات طول الاسبوع تتقطع فى الآخر أوتاخد مينس 2 بحجة قال إيه ماكتبتش اسمك على اللوحة ده غير الورش ومشوار العباسية وتقعد فى الكلية لحد المغرب وأحيانا العشاء أنا أذكر ان انا مرة فى اعدادى مشيت من الكلية الساعة 9,30 بالليل كان عندنا معمل كيمياء فى كلية العلوم ....

لكن فى كهرباء أو أى قسم تانى مش حتلاقى الكلام ده خالص ..آخرك فى الكلية الساعة 2 بالكتير ده غير ان معاملة المعيدين بتتغير وبتحس يعنى ان انت خلاص بقيت مهندس ...
لكن أحب أنبهك ان مش معنى كده ان الدراسة حتكون سهلة على العكس المواد ممكن تكون أصعب كتير...............

وبالتوفيق ان شاء الله

متشكر اوى يا باشمهندس

بس الحمد لله انا نتيجتى طلعت امبارح على النت
وعرفت انى جبت جيد جدا

وناوى ان شاء الله ادخل كهربا

ممكن تدينى معلومات عن المواد والدكتارة فى سنة اولى
معلش هتعبك شوية

على من يجد نتيجة ثانية مدني يكلمني على 0125593479 او 0132463120
وله الاجر و الثواب عند الله
وهذا من باب اغاثة الملهوف
وسلمولي على كل طلاب 2 مدنى

أنا أعتقد أن السبب في تأخير نتيجة أولي كهرباء هو
د/عبد ربة

المهم بس يديك النتيجة صح بعد ما يأخد الفلوس مش يأخد الفلوس ويقلك اى حاجة